Taka ekki þátt í mótun starfsmannastefnu

H-listinn í Vogum hefur ákveðið að taka ekki þátt í vinnu við starfsmannastefnu sveitarfélagsins og hefur bæjarfulltrúi listans sagt sig úr stýrihópi verkefnisins.

Málið kom til umfjöllunar á síðasta bæjarstjórnarfundi í Vogum. Þar lagði bæjarfulltrúi H-listans, Inga Sigrún Atladóttir, fram bókun vegna málsins þar sem hún átelur vinnubögð við málið.

„Vinnubrögð þau sem hafa verið viðhöfð í undirbúningi að endurskoðun starfsmannastefnu sveitarfélagsins eru mér ekki að skapi.  Ítrekað hef ég gert athugasemdir við hönnun verkefnisins en ekki hefur verið tillit til þeirra. 
Í kjölfar kynningar bæjarstjóra á verkefninu á bæjarráðsfundi þann 11.desember skýrði ég afstöðu mína.  Ég mun því segja mig úr stýrihópi verkefnisins og tilkynni hér með að H-listinn hyggst ekki tilnefna mann í hópinn.  Um leið bið ég starfsmenn bæjarins að láta afstöðu H-listans ekki hafa áhrif á viðhorf sitt til verkefnisins," segir í bókun Ingu Sigrúnar.

Fram kom í umræðu um málið að sérstök spurningakönnun hafi ekki verið kynnt fyrir stýrihópnum áður en hún var lögð fyrir. Við það var Inga Sigrún m.a. ósátt.