Tæplega 1,800 atvinnulausir á Suðurnesjum

Alls eru 1,798 manns nú skráðir atvinnulausir á Suðurnesjum, 1,023 karlar og 775 konur.  Á vef Vinnumálastofnunar segir að ákveðna fyrirvara verði að hafa við mat á atvinnuleysi út frá þessum tölum þar sem hluti fólksins er í hlutastarfi á móti bótum. Í heildina mun það vera um 20% þeirra 16, 400 einstaklinga sem skráðir eru atvinnulausir á landinu öllu. Hlutfallslega er atvinnuleysið mest á Suðurnesjum.

„Við erum að horfa á atvinnuleysistölur sem við höfum aldrei séð áður. Þetta eru uggvænlegar tölur. Góðu fréttirnar eru þær að það virðist vera hægja á fjölguninni,“ sagði Guðbrandur Einarsson, formaður Verslunarmannafélags Suðurnesja og bæjarfulltrúi A-lista, á síðasta bæjarstjórnarfundi í Reykjanesbæ þegar atvinnumálin voru til umfjöllunar.
Guðbrandur sagðist vona að það benti til þess að botninn í atvinnuleysinu væri að nást þannig að komin væri viðspyrna upp á við á nýjan leik.