Svipuð aðsókn í Vinnuskóla Reykjanesbæjar

Alls skráðu 394 unglingar í 8. - 10. bekk grunnskóla sig í Vinnuskóla Reykjanesbæjar sumarið 2004 sem er 77% af árgöngunum þremur og svipuð aðsókn og árið 2003.
Þetta kemur fram í Ársskýrslu Vinnuskóla Reykjanesbæjar 2004.
Vinnuskóli Reykjanesbæjar er vinnustaður fyrir unglinga á aldrinum 14 - 16 ára. Í flestum tilfellum er um að ræða fyrstu kynni unglinga af launaðri vinnu og því mikilvægt að vel takist til.
Í árgöngunum þremur voru 513 nemendur á aldrinum 14 - 16 ára og af þeim skráðu 394 sig í Vinnuskólann sem er um 77% hlutfall. Flestir nemendur voru í 8 bekk eða 84% af árgangi. Þar á eftir koma nemendur í 9. bekk eða 82% af árgangi og síðast nemendur í 10. bekk eða 65% af árgangi.
Fæstir skila sér úr 16 ára árgangi og er það eðlilegt þar sem þau eiga meiri möguleika á vinnu á almennum vinnumarkaði en yngri unglingar.

Helstu verkefni Vinnuskólans voru:
Beðahreinsun, hverfahreinsun, sláttur og rakstur, tyrfing, málningarvinna og fl.
Starfstímabilið var þrír mánuðir frá júní til ágúst. Vinnuvikunum var skipt í tvö tímabil og fékk hver unglingur vinnu á öðru þeirra.
Að auki var boðið upp á fjölbreytt námskeið og má þar nefna námskeið fyrir flokkstjóra Vinnuskólans í vinnuvernd og félags- og líkamsþroska unglinga og þróun sjálfsmyndar. Samið var við jafningjafræðslu Hins hússins sem hélt námskeið fyrir nemendur í 10. bekk
Nemendum í 7. bekk bauðst líkt og undanfarin ár að sækja tveggja vikna tómstundanámskeið sem félagsmiðstöðin Fjörheimar skipulagði og vann í samvinnu við Vinnuskólann.
Í sumar voru unglingar frá Vinnuskólanum til aðstoðar á íþrótta- og leikjanámskeiði og hjá knattspyrnuskóla UMFN.
Boðið var upp á slátt í görðum fyrir öryrkja og ellilífeyrisþega og voru hátt í 279 garðar slegnir að meðaltali þrisvar sinnum um sumarið. Við þessi störf unnu 10 unglingar auk flokkstjóra og var almenn ánægja með þá þjónustu.

Breytingar fyrirhugaðar á starfsemi Vinnuskólans
Gert er ráð fyrir að nokkrar breytingar verði á starfsemi Vinnuskólans á næsta sumri miðað við fjárhagsáætlun Reykjanesbæjar 2005.
Gert er ráð fyrir að fækka vinnuvikum nemenda og auka fræðslu og starfskynningar fyrir nemendur í 9. og 10. bekk. Einnig verða gerðar breytingar á vinnutímabilum.