Fimmtudagur 18. mars 1999 kl. 21:30
SVART OG SYKURLAUST
HAMINGJUÓSKIR Í upphafi bæjarstjórnarfundar Reykjanesbæjar í fyrradag las Kjartan Már Kjartansson, sem leysti Skúla Skúlason af í sæti forseta bæjarstjórnar, skeyti frá bæði mannvirkjanefnd KSÍ og Fimleikasambandi Íslands þar sem bæjarstjórn voru sendar árnaðaróskir vegna ákvörðunar um byggingu fjölnota íþróttahús. Minnihlutinn tók þeim skeytum með fyrirvara og sagði þau komin frá aðilum sem þyrftu ekki að borga fyrir byggingu hússins en gætu hugsanlega séð sér hag í notkun þeirra. Á sama tíma og skeytin væru lesin væru nágrannabyggðarlögin í kringum höfuðborgina að funda um byggingu samskonar húss á því svæði og hugsanlega myndi það einnig rísa á næsta ári. Það má því búast við fleiri skeytasendinum frá íþróttasamböndunum á næstunni. KRISTJÁN ÆÐSTIPRESTUR Kristján Gunnarsson furðaði sig á því að Verkafl fengi að byggja og eiga þetta fjölnota hús án þess að borga neina fasteignaskatta af því til bæjarins. Hann spurði og hvort fleiri hús ættu því ekki að eiga kost á því að borga ekki fasteignaskatta, t.d. væri Keilusalurinn íþróttahús í þeirri merkingu og sennilega gæti hann sem formaður Verkalýðsfélagsins, sett upp kirkju í Félagsbíói, en kirkjur, skólar, íþróttahús og fleiri stofnarnir eru undanþegnar fasteignaskatti, samkvæmt svörum frá bæjarstjóra með vísan í sveitarstjórnarlög. Ellert bæjarstjóri sagði að jafnræðisreglan gilti í þessu sambandi og því væru það einfaldar staðreyndir að einkafyrirtæki sem aðrar stofnanir, væru undanþegin þessum gjöldum vegna byggingu slíkra húsa. Hann benti og á að sennilega gæti eigandi húsnæðisins sem Keilusalurinn er í, sótt um niðurfellingu fasteignagjalda en á móti teldi hann þá leiguna fyrir húsnæðið eiga að lækka sem svaraði þeim gjöldum. Nú er bara að sjá hvort Kristján verði orðinn æðstiprestur fasteignagjaldasafnaðarins sem messi á sunnudögum í Félagsbíói, kl. 3, 5, 7 og 9. Ef þú veist um meinlaust slúður og gamansögur sendu okkur á faxi 421-2777 eða á netfangið:
[email protected] MEIRIHLUTI Á PILLUNNI Efstu menn á lista Samfylkingarinnar á Reykjanesi mættu sem áheyrendur á fund bæjarstjórnar Reykjanesbæjar sem haldinn var sl. þriðjudag, sennilega til að styrkja minnihlutann í, að því er virðist, óþreytandi umræðum um fjölnota íþróttahús. Þar máttu þeir sín lítils gegn ofurkrafti meirihlutans og læddu þeir sér út fljótlega eftir upphaf fundarins. Kristmundur Ásmundsson, læknir og jafnaðarmaður vill hinsvegar meina að þennan ofurkraft eigi að nota í annarskonar aðgerðir í bæjarfélaginu en að keyra bæinn á gjörgæslu Félagsmálaráðuneytisins . Hann vill fyrir alla muni koma vitinu fyrir meirihlutann áður en hannr lendir í höndunum á læknum ráðuneytisins og sjálfur hefur hann boðið þeim ókeypis læknisþjónustu með ígrunduðum jafnaðar- og félagshyggjuaðgerðum. Meirihlutinn segist hinsvegar vera á pillunni og þurfi engrar aðstoðar við. DÝRASTI BÆJARFULLTRÚINN Eftir mikið orðaskak um ágæti fjölnota íþróttahúss fyrir bæjarfélagið, þar sem minnihlutinn ýmist ásakaði meirihlutann um klikkun, hroka eða ábyrgðarleysi og Jóhann Geirdal síðan tilnefndi Jónínu Sanders, dýrasta bæjarfulltrúann á landinu, fyrir sína loforðagjörð í títtnefndu máli, gáfu bæjarfulltrúar sér tíma í kaffihlé á eftir. Þar var Jóhanni óskað til hamingju með árangur sonar síns, sem nýlega varð Norðurlandameistari í keilu unglinga og þegar þeim árnaðaróskum var komið til skila varð Þorsteini Erlingssyni á orði, að það væri gott að vita til þess að það væri einhver íþróttamaður í fjölskyldunni. KEFLAVÍK GLEYMIST EKKI Ekki voru allir ánægðir úr knattspyrnuforystunni í Keflavík að fá ekki að vera viðstaddir undirskrift samninga um fjölnota íþróttahús í Myllubakkaskóla-húsinu sl. sunnudag. Enginn úr knattspyrnuforystunni var á staðnum nema tveir yngri flokkar. Varaforseti Íþróttasambands Íslands,Sigríður Jóhannsdóttir, var í hópi gesta og lýsti hún ánægju sinni með þetta hús í Keflavík, eins og hún sagði. Bæjarstjórinn var fljótur að leiðrétta hana, Reykjanesbæ..
