Sumarbústaðabyggð rís á Þóroddstöðum

Nú stendur yfir framkvæmd við sumarbústaðabyggð sem staðsett er á Þóroddstöðum, rétt fyrir utan Sandgerði. Ingimar Sumarliðason er eigandi Þóroddstaða og hefur hann í samvinnu við Sandgerðisbæ verið að skipuleggja byggðina á landi sínu og landi við hliðina sem er í eigu Sandgerðisbæjar.Ingimar mun sjálfur eiga og leigja út 7 af 20 bústöðum sem skipulagt er að verði á svæðinu og er þegar búið að reisa þrjá sumarbústaði. Þá hefur Sandgerðisbær verið að setja upp þjónustumiðstöð á svæðinu, en í það er notað húsnæði gömlu vigtarinnar í Sandgerði.

Sandgerðisbær mun einnig reisa sumarbústaði og leigja út lóðir til byggingar bústaða á svæðinu. Ingimar sagðist í samtali við Víkurfréttir vera bjartsýnn á að þessi hugmynd gæti laðað að ferðamenn til Þóroddsstaða og taldi möguleikana á ferðaþjónustu mikla á þessu svæði með tilliti til uppbyggingar bæði í Sandgerði og Garði. Skammt frá Þóroddsstöðum er staðsettur golflvöllur Sandgerðinga. Ingimar stefnir á að heitt vatn verði lagt að bústöðunum, en Hitaveita Suðurnesja telur kostnað á því ekki arðbæran og hefur því ekki gefið grænt ljós á slíkar framkvæmdir, þó segist Ingimar bjartsýnn á að það verði gert.