Suðurstrandarvegur: Bæjarfulltrúar sammála um legu vegarins

Á fundi á bæjarskrifstofunni þann 30.nóvember sl. kynntu fulltrúar vegagerðarinnar og höfundar nýs aðalskipulags í Grindavík hugmyndir um staðsetningu Suðurstrandarvegar og tengingar af veginum inn í þéttbýlið.

Fram kom að taka þarf tillit til margra ólíkra þátta þegar ákvarða skal legu vegarins. Öryggi, veðurskilyrði, náttúruvernd og nálægð við byggð eru meðal margra slíkra þátta. Mat á umhverfisáhrifum verður væntanlega lagt fram í febrúar og þá mun almenningur geta gert formlegar athugasemdir við fyrirhugaðar framkvæmdir.
Bæjarfulltrúar voru flestir hverjir mættir á fundinn og skiptust á skoðunum. Góð samstaða var á fundinum um heppilegustu legu vegarins og tengingu hans við Grindavíkurveg. Þegar endanleg hönnun liggur fyrir kemur málið aftur til umfjöllunar.