Suðurnesjalögregla í umfangsmiklum aðgerðum vegna skipulagðrar glæpastarfsemi

Lögreglan á Suðurnesjum hefur staðið að umfangsmiklum lögregluaðgerðum á höfuðborgarsvæðinu nú síðdegis vegna rannsóknar á ætlaðri skipulagðri glæpastarfsemi. Fjórir Íslendingar hafa verið handteknir og húsleitir gerðar á allmörgum stöðum að undangengnum dómsúrskurðum. Húsleitir voru gerðar á heimilum, í fyrirtækjum og í annars konar húsnæði og þær aðgerðir standa enn yfir. Í aðgerðunum hefur lögregla lagt hald á bókhaldsgögn, skjöl og ýmsa muni til frekari rannsóknar. Ekki er útilokað að um frekari handtökur og húsleitir verði að ræða.

Hinir handteknu, 3 karlmenn og 1 kona, verða yfirheyrðir en ekki liggur fyrir á þessari stundu hvort krafist verður gæsluvarðhalds yfir þeim.

Við aðgerðirnar naut Lögreglan á Suðurnesjum aðstoðar lögreglumanna frá Lögreglunni á höfuðborgarsvæðinu, Lögreglustjóranum í Stykkishólmi og Ríkislögreglustjóranum.