Suðurnesjaapótekari með bílaapótek í Kópavogi

Í morgun opnaði Þorvaldur Árnason, kenndur við Apótek Suðurnesja, bílaapótek að Hæðasmára 4 í Kópavogi, hið fyrsta á Íslandi og jafnframt hið fyrsta á Norðurlöndum, en slíkum apótekum hefur fjölgað mikið í Bandaríkjunum síðustu ár.

Það er Lyfjaval ehf sem á hið nýja bílaapótek sem mun heita Lyfjaval Hæðasmára. Kostir bílaapóteka eru m.a. betri þjónusta fyrir þá sem eru hreyfihamlaðir, eru með börn í bíl eða velja þessa leið þægindanna vegna. Margir kunna einnig að meta að þurfa ekki að leita að bílastæði til að fá afgreidd nauðsynleg lyf.

Bílaapótek Lyfjavals er skammt frá Smáralind í Kópavogi og aðkoman er greið. Afgreitt er um lúgu frá klukkan 10 á morgnana til miðnættis, alla daga vikunnar. Mikill tími sparast við að láta símsenda lyfseðla, panta afgreiðslu á fjölnota lyfseðlum sem geymdir eru í bílaapótekinu eða með því að leggja þá inn t.d. að morgni og þá eru lyfin tilbúin þegar viðskiptavinurinn kemur til að sækja þau á leiðinni heim. Einnig er boðið upp á ókeypis heimsendingu á höfuðborgarsvæðinu alla virka daga.

Hefðbundið apótek er einnig í sama húsnæði og bílaapótekið. Hið hefðbundna er opið kl. 10-19 virka daga. Bæði í bílaapótekinu og hinu er veitt lyfjafræðileg ráðgjöf. Lyfjaval hefur, eitt fárra apóteka, tekið í notkun sérstakt lyfjaafgreiðslukerfi, Medicor, til að auka öryggi við afgreiðslu lyfja, m.a. varðandi hugsanlegar milliverkanir.

Fyrir níu árum opnaði Þorvaldur Árnason fyrsta apótekið eftir að frelsi var aukið í lyfsölu, Apótek Suðurnesja. Hann opnaði Lyfjaval í Mjódd í Reykjavík fyrir tveimur árum og í sumar verður enn eitt apótek Lyfjavals opnað í Álftamýri í Reykjavík. Í frétt frá Lyfjavali kemur fram að rekstur apóteksins í Mjódd hafi gengið mjög vel og að viðskiptavinir hafi kunnað að meta persónulega þjónustu á góðu verði, í samkeppni við stóru lyfjabúðakeðjurnar.