Styrkleikar Suðurnesjanna

Víkurfréttir hafa undanfarna daga fjallað um áfangaskýrslu Suðurnesjavaktarinnar, samstarfshóps um velferðarmál á Suðurnesjum, sem kom út fyrir skömmu. Hér heldur sú umfjöllun áfram en áður hefur verið fjallað um ýmis mál sem miður hafa farið á svæðinu. Sveitarfélögin á Suðurnesjum vinna flest eftir yfirlýstum stefnum varðandi fjölskyldumál, forvarnir, fjölmenningu, skólamál og jafnréttismál. Hér að neðan eru tíunduð mál sem standa sterkum fótum að mati Suðurnesjavaktarinnar.

Öflugar menntastoðir

Á Suðurnesjum starfa öflugar menntastoðir en þar fer fremstur í flokki Fjölbrautaskóli Suðurnesja. Þrátt fyrir allt sem gengið hefur á undanfarna daga þá er FS enn stærsta og öflugasta menntastoð Suðurnesja og mun vera það um ókomna tíð. Fisktækniskólinn, Miðstöð símenntunar á Suðurnesjum og Samvinna starfsendurhæfing gegna einnig mikilvægu starfi. Á Ásbrú hefur einnig byggst upp öflugt háskólasamfélag en þar er starfræktur Keilir, miðstöð vísinda, fræða og atvinnulífs.

Virkni- og starfsendurhæfingarúrræði

Á Suðurnesjum eru fjölbreytt virkni- og starfsendurhæfingarúrræði í boði fyrir einstaklinga sem ekki eru á vinnumarkaði, til dæmis vegna veikinda, slysa- og félagslegra erfiðleika. Má þar nefna Samvinnu, Björgina–geðræktarmiðstöð Suðurnesja, Virkjun og Fjölsmiðjuna. Miðstöð símenntunar á Suðurnesjum býður einnig upp á ýmis virkniúrræði og á í góðu samstarfi við Vinnumálastofnun hvað það varðar.

Íþróttir og tómstundir

Suðurnes eru þekkt fyrir góðan árangur í íþróttum og þar er unnið öflugt íþróttastarf með og fyrir börn og unglinga. Má nefna að í vetur urðu karlalið Grindavíkurbæjar og kvennalið Njarðvíkur Íslandsmeistarar í körfubolta og karlalið Keflavíkur bikarmeistarar. Fyrir stuttu náðu Holtaskóli og Heiðarskóli í Reykjanesbæ þeim frábæra árangri að verða í tveimur efstu sætunum í Skólahreysti. Á Suðurnesjum er tónlistarskóli í hverju sveitarfélagi nema í Sveitarfélaginu Vogum. Einnig er öflugt æskulýðsstarf á svæðinu eins og skátarnir, KFUM og KFUK og æskulýðsstarf kirkjunnar.

Fjölbreytt menningarlíf og afþreying

Á Suðurnesjum er að finna fjölbreytt menningarlíf og afþreyingu sem felst meðal annars í blómlegu tónlistarlífi, listviðburðum, söfnum, sýningum og leikhúslífi. Tónlistarlíf á Suðurnesjum er öflugt en þaðan hafa komið margir efnilegir tónlistarmenn og hljómsveitir. Árlegar hátíðir sveitarfélaganna, eins og Ljósanótt í Reykjanesbæ, Sjóarinn síkáti í Grindavík, Sólstöðuhátíð í Garði, Sandgerðisdagar og Bryggjudagar í Vogum, draga að sér fjölda fólks sem setur mark sitt á bæjarlíf sveitarfélaganna. Á Suðurnesjum er einnig í boði fjölbreytt afþreying fyrir börnin. Í Reykjanesbæ er Listahátíð barna haldin árlega og á svæðinu er að finna landnámsdýragarð, Skessuhelli, Fræðasetrið í Sandgerði, Saltfisksetrið í Grindavík og fleira.

Ferðaþjónusta

Síðustu ár hefur starfsemi í ferðaþjónustu færst í aukana á Suðurnesjum. Öll sveitarfélögin hafa að geyma spennandi aðdráttarafl fyrir ferðamenn og má þar nefna Fræðasetrið í Sandgerði, Garðskagavita og fjölbreytt fuglalíf þar í kring, Duushús og Víkingaheima, Kvikuna sem er auðlinda- og menningarhús í Grindavík, að ógleymdu Bláa lóninu. Heilsutengd ferðaþjónusta hefur farið vaxandi á svæðinu þar sem bæði innlendir og erlendir einstaklingar eiga kost á að sameina lækningameðferðir og ferðalag um landið. Á Ásbrú er einnig unnið að uppbyggingu heilsuþorps og á svæðinu er verulegt framboð af húsnæði fyrir margþætta starfsemi. Nálægðin við alþjóðaflugvöll hefur komið sér vel fyrir ferðaþjónustu á svæðinu.

Fyrirtæki og önnur starfsemi

Starfsemi í tengslum við Keflavíkurflugvöll, Hitaveitu Suðurnesja og Helguvík er mikill styrkleiki fyrir svæðið sem mun koma til með að styrkjast enn frekar á næstu árum. Á Ásbrú, gamla varnarliðssvæðinu, hefur fjöldi fyrirtækja sest að, bæði rótgróin fyrirtæki og frumkvöðlafyrirtæki. Í frumkvöðlasetrinu Eldey eru starfandi um 18 sprotafyrirtæki í tengslum við atvinnuþróunarfélagið Hekluna. Á svæðinu er nóg framboð af húsnæði og tækifærin því mörg. Þróunarfélag Keflavíkur, Kadeco, sér um að koma fasteignum á svæðinu í notkun og vinnur markvisst að því að laða að fleiri fyrirtæki.