Stjörnuregn í Leifsstöð

Sannkallað stjörnuregn var í Leifsstöð í morgun þegar hver Hollywood stjarnan lenti á fætur annarri. Fyrst lenti Julia Stiles einsömul, sem þekkt er fyrir leik sinn í 10 things I hate about you, en hún kom með áætlunarflugi Flugleiða frá New York. Eftir það lenti Forest Whitaker, sem er hvað frægastur fyrir The Crying Game, en hann kom með áætlunarflugi Flugleiða frá Minneapolis. Whitaker kom hingað með eiginkonu sinni til 8 ára, módelinu Keisha Simone Nash.

Þau komu „low-profile“ eins og einhverjir myndu eflaust kalla það en það er alveg ljóst að þessir stórleikarar hefðu alveg haft efni á því að lenda með einkaflugvél á Keflavíkurflugvelli.

Þegar stjörnurnar birtust í Leifsstöð stökk ljósmyndari Víkurfrétta til og smellti á þeim myndum þegar þau gengu út úr flugstöðinni. Fólkið sem mætt var til að taka á móti vinum og ættingjum sínum vissu ekki hvað gengi á og spurðu eftir á hverjir þetta voru. Bandaríkjamenn sem mættir voru til að taka á móti vinum og ættingjum brá samt heldur betur í brún þegar þau sáu þessar stórstjörnur á litlum flugvelli á Íslandi.

Þau eru mætt hingað til lands til þess að leika í kvikmynd Baltasar Kormáks, „A Little Trip to Heaven.“ Tökur á myndinni eiga að hefjast 24. ágúst næstkomandi.

Þetta er sannkallað stjörnusumar með tilkomu allmargra stórstjarna hingað til lands.



VF-myndin: Atli Már Gylfason