Stjórn Þróunarfélagsins fagnar úttekt

Stjórn Þróunarfélags Keflavíkurflugvallar fagnar því að Ríkisendurskoðun hafi ákverðið að gera úttekt á starfsemi félagsins, eins og stjórnin óskaði raunar eftir fyrr á árinu. Í tilkynningu segjast stjórnarmeðlimir vera þess fullvissir að úttektin leiði í ljós að við sölu fasteigna á Keflavíkurflugvelli hafi í öllu verið farið eftir lögum um Þróunarfélag Keflavíkurflugvallar. Ennfremur að unnið hafi verið samkvæmt þeim skilyrðum og fyrirmælum sem félaginu voru sett.

Stjórn félagsins segir tilganginn með stofnun þess hafi meðal annars verið að koma fasteignum í eigu ríkisins á Keflavíkurflugvelli sem fyrst í arðbær borgaraleg not með það að markmiði að jákvæð samfélagsleg áhrif verði sem mest og neikvæðum áhrifum á nærsamfélagið verði haldið í lágmarki.

Þróunarfélagið hefur að þeirra sögn, allt frá stofnun í október 2006, unnið faglega samkvæmt þjónustusamningi þess við ríkið. Það hafi frá upphafi kallað eftir áhugasömum aðilum með hugmyndir um nýtingu eigna á svæðinu, meðal annars með áberandi auglýsingum með vísun í upplýsandi vef félagsins, þar sem allar óseldar eignir ríkisins á svæðinu eru kynntar og söluskilmálar tíundaðir.