Stillti útvarpið og ók á ljósastaur

Nokkuð hefur verið um umferðaróhöpp í umdæmi lögreglunnar á Suðurnesjum á undanförnum dögum. Ökumaður sem var að stilla útvarp í bifreið sinni á Njarðvíkurvegi leit af akbrautinni og ók á ljósastaur.

 

Rúmlega tvítugur karlmaður lenti í slysi á krossara í malarnámu við Stapafell/Rauðamel og var hann fluttur með sjúkrabifreið undir læknis hendur.

 

Þá hafnaði vespa, sem ekið var yfir Vesturgötu á gangbraut, á bifreið sem ekið var eftir götunni í sömu svifum.

 

Ökumaður sem ók viðstöðulaust yfir stöðvunarskyldu ók í veg fyrir aðra bifreið sem kom aðvífandi. Flytja þurfti farþega annarar bifreiðarinnar með sjúkrabifreið á Heilbrigðisstofnun Suðurnesja.

 

Loks var bifreið ekið út af Reykjanesbraut vestan Grindavíkurvegar. Ökumaðurinn var fluttur með sjúkrabifreið til aðhlynningar á HSS. Hann er grunaður um fíkniefnaakstur.