Sterk viðbrögð við undirskriftasöfnun

Sterk viðbrögð hafa verið við undirskriftasöfnun Hannesar Friðrikssonar, íbúa í Reykjanesbæ, en hún var kynnt á blaðamannafundi í gær. Vel á þriðja þúsund manns hafa skrifað undir listann og er þá ótalinn sá fjöldi fólks sem skráir sig á netútgáfu hans sem er á slóðinni www.askorun2007.is.

Með undirskriftalistanum er skorað á sveitarstjórnarmenn á Suðurnesjum að tryggja meirihlutaeigu sveitarfélaganna í Hitaveita Suðurnesja sem annist áfram orkuöflun og sölu og dreifingu á vatni og rafmagni. Hannes segir að íbúar á svæðinu hafi aldrei verið spurðir um hug þeirra í öllu því ferli sem hófst við sölu á hlut ríkisins í HS og endaði með sameiningu GGE og REI. Né heldur hafi það komið til tals fyrir síðustu kosningar að selja eða einkavæða HS.

Í kjölfar á sölu ríkisins hafi farið í gang atburðarás, sem leitt hafi til þeirrar stöðu sem íbúar standi frammi fyrir í dag og við því þurfi að bregðast. Hannes vill meina að bæjaryfirvöld í Reykjanesbæ hafi misst stjórn á atburðarásinni við sameiningu GGE og REI. Í öllu ferlinu hafi aldrei verið staldrað við og spurt hvað íbúunum væri fyrir bestu. Þeir hafi heldur aldrei verið spurðir og því sé mikilvægt fyrir íbúalýðræðið að þeir segi skoðun sína.


Mynd/elg: Hannes Friðriksson segir tímabært að  íbúar á Suðurnesjum segi hug sinn í Hitaveitumálinu. Sterk viðbrögð hafa verið við undirskriftasöfnuninni sem hófst í gær.