Stefnt að byggingu Thorsil í byrjun næsta árs
- Fjárfesting upp á 29,3 milljarða
Stefnt er að því að hefja framkvæmdir við kísilverksmiðju Thorsil í Helguvík í byrjun næsta árs. Frá þessu er greint á vef Viðskiptablaðsins. Þar er rætt við Hákon Björnsson, framkvæmdastjóra Thorsil, og segir hann fjármögnun verksmiðjunnar langt komna en áætlað er að kostnaður við byggingu hennar verði um 29,3 milljarðar króna.
Umhverfisstofnun gaf út starfsleyfi til Thorsil í febrúar síðastliðnum en sú útgáfa var kærð af íbúum í Reykjanesbæ, Landvernd og Náttúruverndarsamtökum Suðvesturlands.
Í viðtalinu í Viðskiptablaðinu var Hákon spurður út í stöðu mála hjá kísilverksmiðju United Silicon í Helguvík en reyk- og lyktarmengun þaðan hefur fundist á Suðurnesjum og hefur Umhverfisstofnun stöðvað framleiðslu þar. Hákon sagði ástandið þar valda Thorsil vandræðum. Þar hafi greinilega verið illa að málum staðið og að lyktarmengun þekkist ekki í þessum bransa.
