Stálu rafmagni úr sameign fyrir gleðskap í rafmagnslausri íbúð

Lögreglan í Keflavík þurfti tvívegis að hafa afskipti af gleðskap í fjölbýlishúsi í Keflavík um helgina. Í fyrra skiptið var tilkynnt um mikinn hávaða frá íbúðinni fyrir miðnætti á föstudagskvöld. Gleðskapur ungmenna stóð yfir í íbúðinni. Það sem jafnframt vakti athygli lögreglunnar var að íbúðin var rafmagnslaus og rafmagnstaflan innsigluð en rafmagn var lagt inn í íbúðina með fjöltengjum úr sameign.
Eftir talsverð orðaskipti lögreglunnar við fólk í íbúðinni var gleðskapnum hætt og fólkið yfirgaf íbúðina. Þegar líða tók á nóttina var gleðskap slegið upp að nýju í íbúðinni. Aftur kom lögreglan á staðinn. Í fyrstu sinntu húsráðendur ekki óskum lögreglunnar um að opna íbúðina. Það var ekki fyrr en lögreglan tók fjöltengi úr sambandi og gerði gleðskapinn rafmagnslausan að fólkið sýndi viðbrögð. Eftir orðaskipti tókst að fá fólkið til að hafa hljótt, svo aðrir íbúar hússins gætu sofið rólegir.
Umrædd íbúð er félagslegt húsnæði á vegum Reykjanesbæjar. Húsráðandi hefur ekki búið í íbúðinni svo vikum og mánuðum skiptir. Hins vegar kemur þangað einstaklingur tengdur húsráðanda mjög reglulega og slær upp gleðskap, sem oftar en ekki endar inni á borði lögreglunnar í Keflavík. Víkurfréttir hafa fyrir því heimildir að íbúum í húsinu sé nú nóg boðið og muni félagsmálayfirvöldum í Reykjanesbæ verða send formleg kvörtun í vikunni með ósk um úrbætur.