Stærsta farþegaþota heims í Keflavík
– Lenti með veikan farþega.
Airbus A380 farþegaþota frá British Airways er nú stödd á Keflavíkurflugvelli þar sem hún lenti fyrr í kvöld vegna veikinda farþega um borð.
Farþeginn hefur verið fluttur á sjúkrahús en farþegavélin, sem er engin smásmíði, stendur uppljómuð við flugskýli 885 á Keflavíkurflugvelli.
Víkurfréttir hafa ekki nánari upplýsingar um ferðalag vélarinnar, þ.e. hvort hún var á leið austur eða vestur um haf.
Airbus A380 vélar eru nokkuð kunnar á Keflavíkurflugvelli, en þá helst fyrir það að hér voru þær prófaðar í öflugum hliðarvindi áður en þær fóru í sölu á almennum markaði.
Meðfylgjandi myndir voru teknar nú áðan af vélinni þar sem hún stendur við skýli 885. VF-myndir: Hilmar Bragi
