Staðfestu áratuga vináttusamband

Hátíðleg athöfn fór fram í Kjarna sl. föstudag þegar kafteinninn á Keflavíkurflugvelli, Sir Mark Anthony og Ellert Eiríksson, bæjarstjóri Reykjanesbæjar, undirrituðu yfirlýsingu um að treysta
sameiginleg vináttubönd og að vinna að sameiginlegum hagsmunum Reykjanesbæjar og bandarísku flotaflugstöðvarinnar á Keflavíkurflugvelli.
Með undirritun þessa samkomulags samþykkja aðilar að skiptast á hugmyndum og vinna að verkefnum á sviði menningar, menntunar, íþrótta og viðskipta sem og á öðrum sviðum til að stuðla að fjölbreyttum og öflugum tengslum.
Ellert Eiríksson setti athöfnina og bauð gesti velkomna. Hann talaði m.a. um að samstarf þessara tveggja aðila hefði verið mjög gott síðastliðin 50 ár. „Með þessari undirritun hefur samstarfið verið staðfest formlega. Yfirmannaskipti á flotastöðinni eru tíð og því er nauðsynlegt að nýir yfirmenn geti gengið að slíku samkomulagi vísu. Þetta hefur verið munnlegt en nú er það orðið formlegt“, sagði Ellert af þessu tilefni.
Mark Anthony þakkaði Ellerti fyrir gott samstarf á undanförnum tveimur árum sem hann hefur gegnt stöðu kafteins og að því loknu undirrituðu þeir samkomulagið á fiskroð.