Sprunginn strætó í Garðinum
Það ánægjulega vandamál hefur komið upp varðandi strætóferðir á milli Garðs, Sandgerðis og Reykjanesbæjar, að nýting á þessum ferðum hefur sprengt allt skipulag utan af sér.
Strætóinn fer nú ellefu sinnum á dag virka daga og fjórum sinnum á dag um helgar eða samtals sextíu og þrjár ferðir í hverri viku og hefur greinilega verið þörf á, þar sem komið hefur upp að ekki hafi verið pláss fyrir alla í sumum ferðunum, og aukabíll sendur til að redda málum.
Garður og Sandgerði greiða fyrir ferðirnar og eru þær því fríar fyrir þá sem nýta sér strætóinn.
Vegna þessarar óvæntu notkunar á strætó var ákveðið á samráðsfundi, nú nýverið, að stökkva til og aðlaga kerfið þessari miklu aukningu, þrátt fyrir að nýbúið sé að gera breytingar á kerfinu
.
Byrjað verður að aka eftir nýrri áætlun mánudaginn 25. febrúar.
Þessi mikla þjónusta sem nú er veitt hefur kallað t.a.m. á samstarf íþróttafélaganna fjögurra á svæðinu, en knattspyrnudeildir Reynis, Víðis, Keflavíkur og Njarðvíkur eru komnar í samstarf með nokkra flokka iðkenda sem byggist að miklu leyti á að boðið sé upp á þessar ferðir hér á milli byggðarlaganna.
Helstu breytingarnar eru þrjár.
-Ferð kl. 14:15 verður flýtt og verður hún kl. 14:00 virka daga.
-Einni ferð er bætt við kl. 16:15 alla virka daga.
-Eftir tvær fyrstu ferðir dagsins, sem aka leiðina Reykjanesbær - Sandgerði - Garður - Reykjanesbær og eru kallaðar "skólaferðir", breytist akstursleiðin og verður Reykjanesbær - Garður - Sandgerði - Garður - Reykjanesbær. Við það breyast einnig biðstöðvar í Sandgerði og Garði. Stoppað verður við Miðhús í stað Hlíðargötu í Sandgerði og ekki verður farið út að Nýjalandi í Garðinum. Verður því Bræðraborg ysta biðstöðin í Garðinum, þ.e. eftir tvær fyrstu ferðirnar.
Vonast forstöðumenn strætó og fulltrúar bæjarfélaganna til að þetta auki þjónustuna og létti á þeim álagspunktum sem hafa myndast.
