Sprengjuhótun í Leifsstöð

Lögreglu barst tilkynning um að sprengja væri í Flugstöð Leifs Eiríkssonar á fjórða tímanum í nótt en umfangsmikil leit leiddi í ljós að um gabb var að ræða. Engar tafir urðu á flugi en nokkur bið varð á afgreiðslu á nokkrum stöðum í flugstöðinni á meðal leitin fór fram.

Ellisif Tinna Víðisdóttir, staðgengill sýslumannsins á Keflavíkurflugvelli, segir í viðtali við Morgunblaðið, hótunina hafa komið inn í gegn um fjarskiptamiðstöð lögreglu og að í framhaldi af því hafi viðbúnaðaráætlun verið sett í gang. Þá segir hún að allir starfsmenn sýslumannsembættisins á flugstöðinni hafi tekið þátt í leitinni sem hafi tekið um klukkutíma.

Ellisif segir hótunina hafa verið þess eðlis að yfirvöld hafi talið líklegt að um gabb væri að ræða en að þegar slík mál komi upp sé ekki hægt annað en að taka þau alvarlega þar sem ekki sé hægt að útiloka neitt fyrr en málið hafi verið kannað. Þá segir hún málið litið mjög alvarlegum augum og að það verði sótt af fullri hörku enda séu sprengjuhótanir ekkert grín.