Sprengjuæfingasvæða leitað

Varnarmálaskrifstofa utanríkisráðuneytisins og Landhelgisgæslan safna nú upplýsingum um svæði hér á landi, sem hafa verið notuð við skot- og sprengjuæfingar frá síðari heimsstyrjöld.
73 svæði eru þekkt en beðið er eftir upplýsingum frá Bretlandi um 27 til viðbótar. Alls gætu svæðin því verið 90, alls um 24.000 hektarar lands. Þetta kemur fram í svari utanríkisráðherra við fyrirspurn frá Jóni Gunnarssyni Samfylkingu. rá þessu er greint á vefsíðu Ríkisútvarpsins.

Flest eru svæðin á Reykjanesskaga og í nágrenni höfuðborgarinnar, en nokkur eru á Vestur-, Norður- og Austurlandi. Greinargóðar upplýsingar eru til um 29 svæði, nokkur hafa verið könnuð lítillega, en önnur ekki. Ekki er hægt að áætla hversu mikið af skotfærum og eða sprengjum er á þessum svæðum öllum, og ekki er heldur útilokað að þau séu fleiri. Þá er ekki hægt að segja fyrir um hversu langan tíma tekur að rannsaka þau og hreinsa. Fram kemur þó í svari utanríkisráðherra, að margra ára verk er framundan.

Landhelgisgæslan hefur lögbundið hlutverk að hreinsa sprengjusvæði hér á landi, en frá árinu 2001 er það á líka á ábyrgð Gæslunnar að kanna ástand varnarsvæða og eyða sprengjum, sem þar kunna að finnast. Til athugunar er í dómsmálaráðuneytinu að fjölga í sprengjueyðingardeild Gæslunnar.