Sparisjóðurinn kærir rangar sakargiftir og tilraun til fjárkúgunar

Sparisjóðurinn í Keflavík hefur sent frá sér fréttatilkynningu vegna umfjöllunar DV og viðtala við Ragnar Sigurðsson er varða Thermo Plus:
Nýverið birtust fréttir af því í DV að þess hefði verið krafist að Sparisjóðurinn í Keflavík yrði sviptur starfsleyfi vegna ætlaðra misgjörða í tengslum við gjaldþrot fyrirtækisins Thermo Plus. Látið hefur verið að því liggja að mikill ,,titringur” sé á Suðurnesjum vegna málsins og að opinber rannsókn standi yfir á alvarlegum afbrotum starfsmanna Sparisjóðsins í Keflavík í tengslum við þetta mál. Vegna þessa er nauðsynlegt fyrir Sparisjóðinn að koma eftirfarandi athugasemdum á framfæri:

1. Í desember s.l. höfðaði Sparisjóðurinn í Keflavík mál gegn Ragnari Sigurðssyni o.fl. vegna ábyrgðar þeirra á skuldabréfi að upphæð kr. 4.500.000. Máli því er ólokið. Eftir málshöfðunina hefur Ragnar Sigurðsson leitast við að koma höggi á Sparisjóðinn í Keflavík með óréttmætum og svívirðilegum ásökunum til lögreglu og Fjármálaeftirlits um skjalafals, umboðssvik, fjársvik og veðsvik sem eiga að hafa átt sér stað innan sjóðsins í tengslum við meðferð hlutabréfa í Thermo plus. Allar þessar ásakarnir eru tilhæfulausar og fráleitar. Síðasta útspil Ragnars var að krefjast þess að Fjármálaeftirlitið svipti Sparisjóðinn í Keflavík starfsleyfi á meðan að lögregla rannsakaði kærur hans! Engin slík rannsókn stóð eða stendur þó yfir.

2. Fregnir af þessu máli hafa nú ítrekað verið birtar í DV eins og um væri að ræða raunverulegt og alvarlegt sakamál en ekki hugarfóstur eins manns. Haft var samband við ritstjórn DV og þeim greint frá stöðu mála þegar í aprílmánuði. Í ljósi síðustu frétta DV, frá 20. og 21 júní verður hins vegar ekki vikist undan því bregðast við óhróðrinum. Í fyrirsögn blaðsins hinn 20. júlí s.l. segir um málið:

,,Uppnám vegna Sparisjóðs Keflavíkur. Krafist sviptingar á starfsleyfinu – vegna opinberrar rannsóknar í tengslum við Thermo plus.”

Í þessu sambandi er rétt að geta þess í fyrsta lagi að Fjármálaeftirlitið hafnaði hinni fráleitu kröfu Ragnars Sigurðssonar um sviptingu starfsleyfis þann 21. þ.m. Í öðru lagi stendur ekki yfir opinber rannsókn á þessu máli. Umræddur Ragnar hefur sent kæru til Ríkislögreglustjóra en þar hefur ekkert verið aðhafst, hvorki rannsókn hafin né kærunni verið vísað frá. Eina uppnámið sem virðist geta verið fyrir hendi er hugarheimi í Ragnars Sigurðssonar og þess blaðamanns DV sem hann virðist hafa á snærum sínum.

3. Í fréttum DV, föstudaginn 21. þ.m. er enn höggvið í sama knérunn. Þar er jafnframt greint frá kynningarfundi sem haldinn var kvöldið áður um breytingu á Sparisjóðnum í Keflavík í hlutafélag og rætt um í fréttinni að flýta ætti hlutfjárvæðingu sjóðsins vegna ,,slakrar fjárhagsstöðu” sjóðsins. Einnig er það haft eftir ónafngreindum heimildarmönnum að til standi að ,,færa niður” hlutafé sparisjóðsins í kjölfar væntanlegra breytinga á félagsformi og bjóða út nýtt hlutafé. Af þessu tilefni verður að taka fram að annað hvort er hér um hreinan skáldskap hjá viðkomandi blaðamanni að ræða, eða heimildarmaður hans hefur algjörlega misskilið til hvers kynningarfundurinn var haldinn og hvað var rætt þar. Fjárhagsstaða Sparisjóðsins í Keflavík er mjög góð og engum hefur dottið í hug að færa niður hlutafé hvað sem það nú þýðir í þessu samhengi.

Vegna þeirrar ófrægingarherferðar sem rekin hefur verið opinberlega með óskiljanlegum atbeina DV hefur stjórn Sparisjóðsins í Keflavík ákveðið að kæra Ragnar Sigurðsson til lögreglu fyrir rangar sakargiftir og tilraun til fjárkúgunar. Jafnframt hefur vinnubrögðum blaðamanns DV verið vísað til Siðanefndar Blaðamannafélagsins og í framhaldi af því verður tekin ákvörðun um höfðun meiðyrðamála gegn viðkomandi blaðamanni og heimildarmanni hans.