Sparisjóðurinn í Keflavík veitir Nýsköpunarverðlaun

Verðlaunaafhending í samkeppni Nýsköpunarsjóðs um gerð viðskiptaáætlana fór fram þann 20. september s.l. Verðlaunin fékk áætlun um þróun og framleiðslu á byltingarkenndum gerviökkla.
Alls bárust 109 viðskiptaáætlanir og hugmyndalýsingar í Nýsköpun 2001 og hefur þátttaka aldrei áður verið meiri. Margar vænlegar áætlanir bárust frá Suðurnesjum og veitti Sparisjóðurinn í Keflavík svæðisverðlaun fyrir bestu áætlunina.
Verðlaunin hlutu Ásta G. Harðardóttir, Bjarni Kristjánsson og Bjarni Ellert Ísleifsson fyrir Talus ehf. - Áætlun um þróun og framleiðslu á byltingarkenndum gerviökkla.
Að þessu sinni tengist keppnin einnig samkeppni sem Evrópusambandið stendur fyrir árlega en fjórar áætlanir voru valdar til þátttöku fyrir Íslands hönd. Sparisjóðir víðs vegar um landið veittu samtals sex svæðisverðlaun og nema þau eitt hundrað þúsund krónur í hverju tilviki.