Sódavatn Icelandic Glacial vinnur til verðlauna

Sódavatn frá Icelandic Glacial hlaut á dögunum viðurkenningu frá stofnuninni The International Taste and Quality Institute. Í tilkynningu frá fyrirtækinu segir að það hafi nýlega hafið framleiðslu á hágæða sódavatni sem tappað er á glerflöskur. Vörunni hefur verið vel tekið á mörkuðum erlendis.

Það voru samtök aðila í veitingageiranum sem veittu sódavatinu viðurkenninguna. Stofnunin sem stendur að henni, The International Taste and Quality Institute, samanstendur af fimmtán stærstu hagsmunasmtökum veitingamanna í Evrópu og segir í tilkynningu frá Icelandic Glacial að viðurkenningin sé fyrirtækinu mikilvægur áfangi í markaðssókn þess inn á mjög sterkan markað.

Keflavíkingurinn Jón Ólafsson, stjórnarformaður fyrirtækisins, kveðst mjög spenntur fyrir þessu skrefi. „Þetta er heil mikil viðurkenning fyrir okkur. Hönnun flöskunnar er stílhrein og sómir vatnsflaskan sér vel á hvaða veisluborði sem er. Við erum að sækja inn á dýrari veitingahús með sódavatnið og erum full samkeppnisfær við þær vörur sem fyrir eru á markaði. Viðurkenningin veitir okkur byr í seglin.“