Sluppu ómeidd úr hörðum árekstri

Í gærdag varð harður árekstur á Víkurbraut við Staðahraun í Grindavík. Blessunarlega urðu engin slys á fólki, en bifreiðarnar voru mikið skemmdar og voru báðar fluttar á brott með kranabifreið. 

Síðar á dagvaktinni voru tveir ökumenn stöðvaðir fyrir að aka sviptir ökuréttindum.  

Í gærkvöld fékk lögregla tilkynningu um að felga hafi skemmst á bifreið eftir að hún ók ofan í holu á Helguvíkurvegi. Var holan hulin vatni þegar óhappið átti sér stað.

Á þriðja tímanum í nótt stöðvaði lögreglan akstur bifreiðar á Hafnargötu í Reykjanesbæ og er ökumaður bifreiðarinnar grunaður um að hafa verið undir áhrifum áfengis.