Slökkvibílar Varnarliðsins: Leigutíminn lengdur í fimm ár

Það hefði verið óraunhæft fyrir íslensk stjórnvöld að ætla að endurnýja allan tækjabúnað slökkviliðs og snjóruðningsdeildar Keflavíkurflugvallar á tæpu ári. Það kom líka á daginn að eftir að Víkurfréttir vöktu athygli á málinu í frétt á forsíðu og í miðopnu síðasta blaðs var ráðist í breytingar á samkomulagi íslenskra og bandarískra stjórnvalda.

Samkvæmt traustum heimildum sem Víkurfréttir birtu í síðustu viku þá hefðu stjórnvöld þurft að útvega tækin á einu ári. Heimildir Víkurfrétta úr stjórnkerfinu herma hins vegar að sólarhring eftir að Víkurfréttir vöktu athygli á málinu hafi verið óskað eftir því af Íslands hálfu að leigusamningurinn fyrir tækin og búnaðinn hljóðaði ekki upp á 11 mánuði heldur yrði fimm ár.

Varðandi mannvirki sem snúa að rekstri flugvallarins þá taka Íslendingar þau yfir eins og greint var frá í gær en leigja allan nauðsynlegan búnað fyrir eina milljón króna á mánuði. Sá leigusamningur er til 11 mánaða til að byrja með.

Samkvæmt heimildum Víkurfrétta hafa bandarísk stjórnvöld heimild til að sækja þann búnað sem þau leigja Íslendingum þegar þeim hentar, án fyrirvara. Íslendingar geta hins vegar sagt upp leigu með mánaðar fyrirvara.