Skúli og Guðbrandur keppa við Jóhann um efsta sætið

Hörð atlaga verður gerð að oddvitasæti Samfylkingarinnar sem stendur fyrir prófkjöri um næstu helgi í Reykjanesbæ. Jóhann Geirdal sem stýrt hefur Samfylkingunni sl. fjögur ár og Alþýðubandalaginu þar á undan fær harða keppni. Prófkjör Samfylkingar í Reykjanesbæ fer fram laugardaginn 23. febrúar í Hólmgarði 2. Kjörstaður verður opinn frá klukkan 9-21. Fimm efstu sætin eru bindandi og kosningarétt hafa allir íbúar Reykjanesbæjar 18 ára og eldri sem og félagar í Samfylkingunni í Reykjanesbæ á aldrinum 16-18 ára.
Þetta eru þeir Guðbrandur Einarsson, formaður Verslunarmannafélags Suðurnesja og Skúli Thoroddsen, forstöðumaður Miðstöðvar símenntunar á Suðurnesjum. Guðbrandur tengist Alþýðuflokksarmi Samfylkingarinnar en Skúli virðist eiga bandamenn bæði þaðan og frá Alþýðubandalaginu. Þeir hafa unnið vel síðustu daga og vikur, svo mikið að stuðningsmenn Jóhanns hafa haft orð á því að baráttan væri orðin allt að því blóðug.
Ljóst er að Jóhann mun eiga undir högg að sækja frá þeim tveimur en hann hefur unnið mikið að undanförnu í „vörninni“ sem líklega verður erfiðari nú en áður. Fyrir fjórum árum sótti Kristmundur Ásmundsson, læknir úr Grindavík, nýfluttur til Reykjanesbæjar, fast að honum, velgdi honum vel undir uggum og kom á óvart í ljósi þess að hann var ekki „heimamaður“. Hann fékk fylgi frá stórum hluta krata-armsins en margir kratar eru óánægðir með Samfylkinguna og vilja nýtt blóð í forystuna, finnst kominn tími á Jóhann sem hefur ýmist verið í minnihluta eða alls ekki komist í bæjarstjórn en það gerðist 1986 og 1990.
Áður en þeir Guðbrandur og Skúli ákváðu að gefa kost á sér í efsta sætið var haft samband við Vilhjálm Ketilsson, skólastjóra Myllubakkakskóla og fyrrverandi bæjarstjóra en hann var í sigurliði Alþýðuflokksmanna sem fékk hreinan meirihluta í Keflavík 1986 og sat í „hreinum“ krataminnihluta frá 1990. Hann gaf afsvar þrátt fyrir að hart hafi verið gengið eftir honum.
En það eru ekki allir kratar á móti Jóhanni. Félagi hans síðustu árin í pólitíkinni, Kristján Gunnarsson, formaður Verkalýðsfélags Keflavíkur og nágrennis styður hann en þeir voru í bandalagi fyrir síðustu kosningar og náðu 1. og 3. sæti. En eins og fyrr segir er það þó stór hluti krata-armsins sem vill nýjan forystusauð í Samfylkinguna. Vitað er að Guðbrandur á stuðning frá mönnum eins og Ragnari Halldórssyni úr Njarðvík og Reyni Ólafssyni úr Keflavík en þeir eru báðir gamlir bæjarfulltrúar krata.
Skúli Thoroddsen hefur getið sér mjög gott orð í Miðstöð símenntunar. Hann er uppalinn vinstra megin við miðju og á marga félaga úr Samfylkingu landsins, eins og Össur Skarphéðinsson og fleiri „jaxla“ þar innfrá. Hann er kannski minnst þekktur þeirra þremenninga hér en hann gæti komið á óvart. „Það eru mjög fáir sem tala illa um hann“ sagði ónefndur pólitíkus og ljóst er að hann býr yfir mikilli pólitískri þekkingu. Heyrst hefur að hann sé með stuðning frá bræðrum úr Ragnarsfjölskyldunni úr Keflavík og það þykir ekki slæmt. Einnig er vitað að Sigurður Ingimundarson, þjálfari Keflavíkur hefur ekki legið á liði sínu enda eru þeir tengdir.
Kvennaveldið ætlar ekki að gefa sinn hlut eftir átölulaust. Sveindís Valdimarsdóttir, kennari og varabæjarfulltrúi ætlar sér stóra hluti og verður líklega ofarlega eins og Ólafur Thordersen, Njarðtaksstjóri Suðurnesja og fyrrverandi handboltastjarna.
Þau hafa bæði sett stefnuna á 2. sætið.
Eins og sjá má í auglýsingu í blaðinu í dag kann Ólafur til verka þegar keppni er annars vegar og virðist kunna best við sig í slíkum ham. Eysteinn Eyjólfsson, sonur Eyjólfs „ríkisstjóra“ Eysteinssonar sækist eftir 3. sætinu. Hann mun líklega fá mörg atkvæði frá hörðustu stuðningsmönnum Jóhanns Geirdal enda hefur Eyjólfur faðir hans stýrt kosningamaskínu Geirdalsins og fleiri allaballa um árabil og því ekki óeðlilegt að ætla að sonurinn færist ofar. Þetta eru þeir sem munu líklega verma efstu sætin. Þeir sem munu koma á eftir eru íþróttamennirnir Friðrik Ragnarsson (Halldórssonar) og Brynjar Harðarson (Ragnarssonar) ásamt söngkonunni Sigríði Aðalsteinsdóttur, Andreu Gunnarsdóttur og Agnari Breiðfjörð sem hefur verið með á listum krata og Samfylkingar frá því elstu menn muna. Þau eru öll óskrifað blað í þessari baráttu.