Skrifað undir samræmdar reglur vegna nætursjónauka

Í gær gerði Landhelgisgæslan samning við Varnarliðið á Keflavíkurflugvelli um samræmdar verklagsreglur vegna þyrluflugs með nætursjónaukum, en frá þessu er greint í fréttatilkynningu frá Landhelgisgæslunni.

Í fréttatilkynningunni segir að þegar flugdeild Landhelgisgæslunnar hafi hafið notkun nætursjónauka í þyrluflugi hafi verið ljóst að náði samstarf yrði hafi við Varnarliðið á Keflavíkurflugvelli þar sem þyrlur beggja aðila fljúgi oft á óhefðbundnum flugleiðum. Á þessum flugleiðum skapast stundum aðstæður þar sem flugumsjón nái ekki að fylgjast með þeim og við vissar aðstæður verði að slökkva á siglingarljósum þyrlanna til að trufla ekki nætursjónaukana. Báðum aðilum var því ljóst að semja varð um samræmdar verklagsreglur til að koma í veg fyrir að hætta skapaðist.

Á fyrri hluta síðasta árs hófust viðræður um hvernig staðið skyldi að gagnkvæmum tilkynningum um nætursjónaukaflug, bæði flug sem ákveðið er með fyrirvara og björgunar- eða sjúkraflug sem ákveðið er í skyndi. Einnig varð að komast að samkomulagi um hvernig fjarskiptasambandi skyldi komið á milli þyrla Landhelgisgæslunnar og Varnarliðsins ef til þess kæmi að þyrlurnar væru samt sem áður á flugi í grennd við hvor aðra.

Eftir að sumarið gekk í garð og ekki var þörf á notkun nætursjónauka um nokkurt skeið frestaðist að ganga frá samkomulagi um samræmdar verklagsreglur. Þegar haustaði og skyggja tók að nýju var unnið eftir reglunum sem búið var að semja. Það var þó mikilvægt formsatriði að ganga frá skriflegri undirritun en hún fór fram í höfuðstöðvum Varnarliðsins á Keflavíkurflugvelli. Einnig var farið yfir ýmsa þætti reglnanna og gengið úr skugga um að báðir aðilar túlkuðu þær á sama veg.

Fulltrúar Landhelgisgæslunnar voru Sigurður Steinar Ketilsson yfirmaður gæsluframkvæmda, Benóný Ásgrímsson flugrekstrarstjóri og yfirflugstjóri, Hjalti Sæmundsson aðalvarðstjóri í stjórnstöð, Ásgrímur Ásgrímsson deildarstjóri sem sér um samskipti við Varnarliðið og Thorben Lund yfirstýrimaður í flugdeild.

Frá Varnarliðinu voru viðstaddir John J. Waickwicz flotaforingi og yfirmaður Varnarliðsins á Keflavíkurflugvelli, Thomas Thompson ofursti, næstæðsti yfirmaður Varnarliðsins, Steven Dreyer ofursti, næstæðsti yfirmaður flughersins í Keflavík, David Duke yfirmaður þyrlusveitar Varnarliðsins, Jarrod Stundahl samskiptafulltrúi Varnarliðsins við Landhelgisgæsluna, Kevin L. Smith ofursti, yfirmaður deildar Varnarliðsins sem sér um skipulag og stefnumörkun og Toby Myers undirforingi í aðgerðadeild.

Myndin:  Kevin L. Smith ofursti, yfirmaður deildar Varnarliðsins sem sér um skipulag og stefnumörkun og Sigurður Steinar Ketilsson yfirmaður gæsluframkvæmda undirrita samninginn. Í baksýn eru Steven Dreyer ofursti, næstæðsti yfirmaður flughersins í Keflavík, David Duke yfirmaður þyrlusveitar Varnarliðsins og Jarrod Stundahl samskiptafulltrúi Varnarliðsins við Landhelgisgæsluna.

Ljósmynd: Ásgrímur Ásgrímsson