Skólastarfið hefst á meðan kosið er um miðlunartillögu

Skólastarf hefst að nýju eftir helgi á meðan kosning um miðlunartillögu ríkissáttasemjara fer fram. Kosningunni lýkur mánudaginn 8. nóvember, verði tillögunni hafnað hefst verkfall á ný þriðjudaginn 9. nóvember.

Fræðslustjóri Reykjanesbæjar hefur náð samkomulagi við Njarðvíkurskóla og foreldraráð skólans um að fresta starfsdegi sem vera átti á mánudaginn og því hefst kennsla þar á mánudaginn líkt og í öðrum skólum.

Birgir Björn Sigurjónsson, formaður samninganefndar Sambands íslenskra sveitarfélaga, fagnar miðlunartillögunni en neitar að tjá sig um hana. Eiríkur Jónsson, formaður Kennarasambands Íslands segist ekki hafa fengið miðlunartillögu ríkissáttasemjara í hendur en gerir ráð fyrir að það verði nú um hádegið. Eiríkur tekur í sama streng og Birgir og ætlar ekki að tjá sig efnislega um tillöguna, þetta kemur fram á vefsíðu Morgunblaðsins.

Miðlunartillaga er neyðarúrræði
Ef samningaumleitanir ríkissáttasemjara bera ekki árangur í kennaradeilunni er honum heimilt skv. 27. gr. laga um stéttarfélög og vinnudeilur nr. 80/1938 að leggja fram miðlunartillögu til lausnar vinnudeilu. Miðlunartillögu skal leggja fyrir félög eða félagasambönd launafólks og atvinnurekenda eða einstakan atvinnurekanda, eigi hann í vinnudeilu, til samþykkis eða synjunar. Sáttasemjara ber að ráðgast við samninganefndir aðila áður en hann ber fram miðlunartillögu. Formleg miðlunartillaga er ekki lögð fram nema aðilar telji að aðrar leiðir hafi verið reyndar til þrautar. Sáttasemjari getur borið fram miðlunartillögu eins oft og honum þurfa þykir. Miðlunartillaga telst felld í atkvæðagreiðslu ef meira en helmingur greiddra atkvæða er á móti henni og ef mótatkvæði eru fleiri en fjórðungur atkvæða samkvæmt atkvæða- eða félagaskrá. Niðurstaða hjá hvorum hópnum fyrir sig, óháð niðurstöðu hins, ræður úrslitum um samþykkt eða synjun. Miðlunartillaga hefur sömu áhrif og frjáls kjarasamningur og er því eins konar kjarasamningsígildi. Þetta kemur einnig fram á vefsíðu Morgunblaðsins.