Skipaður verði starfshópur til eflingar atvinnulífs

Tíu þingmenn úr stjórnarandstöðuflokkunum hafa lagt fram þingsályktunartillögu þar sem þeir vilja að skipaður verði fimm manna starfshópur til að vinna tímasetta aðgerðaráætlun um hvernig megi efla atvinnulíf og samfélag á Suðurnesjum. Hópurinn skili síðan af sér skýrslu í byrjun apríl á næsta ári.

Meðal þess sem fram kemur í greinargerð með tillögunni er að þingmennirnir segja ástandið á Suðurnesjum ekki gott og hafi brotthvarf varnarliðsins haft mikil áhrif á atvinnulíf á svæðinu. Þá hafi svæðið orðið illa úti í efnahagshruninu og atvinnuleysi aukist gríðarlega í aðdraganda þess. Nauðungarsölum fari enn fjölgandi og að eignir Íbúðalánasjóðs séu fleiri á Suðurnesjum en í öðrum landshlutum.

Einnig er nefnt að menntunarstig sé hlutfallslegra lægra en á öðrum svæðum landsins og fjárhagsaðstoð sveitarfélaganna hafi aukist verulega undanfarin ár og að margir íbúar Suðurnesja glími við slæmar afleiðingar langtímaatvinnuleysis. Þá sýni athuganir að mörg börn á Suðurnesjum búi við fátækt og að Suðurnesin hafi skorið sig úr í samanburði við önnur landsvæði hvað fjölda öryrkja varð.