Skipað að fjarlægja olíu úr flaki Guðrúnar

Norsk stjórnvöld hafa skipað norsku strandgæslunni að tæma olíu úr flaki togarans Guðrúnar Gísladóttur sem liggur á hafsbotni í Nappstraumen við Lófót. Á fréttavef norska ríkisútvarpsins, NRK, kemur fram, að Svein Ludvigsen, sjávarútvegsráðherra, hafi samþykkt að ráðuneytið greiði kostnað við að fjarlægja olíuna.
NRK segir að Seløy Undervannservice, norska fyrirtækið sem hefur unnið við að bjarga Guðrúnu Gísladóttur, hafi ekki fengið greiðslur frá íslenska félaginu sem á flakið, og sé því að gefast upp á verkinu.Á fréttavef NRK er haft eftir Hill-Marta Solberg, varaformanni norska Jafnaðarmannaflokksins, að meðferð norskra stjórnvalda á málinu sé pólitískt hneyksli þar sem að íslensku eigendunum hafi í heilt ár tekist að tefja björgun skipsflaksins án þess að norsk stjórnvöld grípi inn í málið. Krefst Solberg þess að norski sjávarútvegsráðherrann láti lyfta flakinu af hafsbotni og sendi síðan reikninginn til íslensku eigendanna, en þetta kemur fram á vef mbl.is.