Skiljanlegt að fólk sé áhyggjufullt

„Fólk er áhyggjufullt og það eru skiljanleg og eðlileg viðbrögð. Ég er svona í því að reyna að sannfæra fólk um það að við ætlum í alvöru að gera allt sem við getum til að milda þetta á alla kanta og vinna með mönnum að einhverju nýju eins og hægt er. Það er nú einu sinni þannig að þegar einar dyr lokast þá opna aðrar. Við erum að skoða alla möguleika með þeim sem mögulega geta lagt þessu lið þannig að fólk þurfi ekki að vera mjög lengi í þessari óvissu,“ segir Pétur Hafsteinn Pálsson, framkvæmdastjóri Vísis hf. í samtali við Víkurfréttir.

 

Vita að þetta er stórmál

Eins og fram hefur komið í fréttum skoða stjórnendur Vísis þann möguleika að flytja alla fiskvinnslu fyrirtækisins í áföngum til Grindavíkur en vinna um leið að uppbyggingu nýrra starfa í hinum bæjarfélögunum þremur, Djúpavogi, Þingeyri og Húsavík. Pétur segir að um þessar mundir sé unnið að því á öllum stöðum að af þessum áformum verði. „Við förum ekki fram með svona áform nema að vel ígrunduðu máli. Við gerum okkur grein fyrir hvað þetta er stórt mál. Ég er að funda bæði með starfsfólki og öllu umhverfi, sem eru sveitastjórnir og allir sem þetta snertir.“

 

Ýmsir möguleikar á borðum

Horft sé til samstarfs við fiskeldin, sem Pétur segir vera mjög vaxandi grein auk ferðaþjónustu, þar sem þar er í nágrenni og geti mögulega átt við. Fleiri möguleikar séu á borðum sem greint verði fá þegar líða fer á mánuðinn. Aðspurður segir Pétur að talsvert sé búið að hafa samband frá aðilum sem eru reiðubúnir í samstarf. „Ég get ekki séð annað en að þetta geti átt vel saman. Þar sem þarf fólk til starfa er hægt að láta hlutina passa saman ef rétt er að málum staðið. Alls staðar þarf tíma og aðlögun og við erum að vinna í því.“

 

Vilja búa til störf

Þá stöðvist fiskvinnslan á Húsavík vegna hráefnisskorts 1. maí og það sé óháð fyrirhugðum áformum tengdum rekstrinum. „Við höfum samtals verið að loka í hálft til eitt ár í öllum fiskvinnslustöðvum á Húsavík. Engar uppsagnir hafa átt sér stað ennþá og við vonumst til að geta búið til störf fyrir þau sem ekki geta eða vilja fylgja okkur,“ segir Pétur. Á Djúpavogi verði óbreytt starfsemi fram á mitt ár í það minnsta og ætlun sé að hafa starfsemi í eitt ár á Þingeyri. „Við erum að nota þennan mánuð í að kortleggja umhverfið og tökum svo ákvarðanir í lok mánaðarins og getum þá sagt hvað er í pípunum.“