Skagagarðurinn verður nýr ferðamannastaður í Garði

Suðurnesjabær fær tvo styrki úr Framkvæmdasjóði ferðamannastaða í tvö verkefni fyrir samtals tæpar fimmtán milljónir króna. Sem liður í sérstöku fjárfestingarátaki stjórnvalda vegna COVID-19-faraldursins hefur sérstöku viðbótarfjármagni að fjárhæð 200 milljónum króna verið ráðstafað úr Framkvæmdasjóði ferðamannastaða. Með því verður unnt að hraða uppbyggingu innviða á ferðamannastöðum, m.a. til að stuðla að öryggi ferðamanna og verndun náttúru landsins.

Suðurnesjabær hafði sótt um styrki úr sjóðnum vegna tveggja verkefna, sem höfðu ekki verið samþykktar í fyrri úthlutun. Þessi verkefni hljóta nú framlög í þeirri viðbótarúthlutun sem tilkynnt var af ferðamála-, iðnaðar- og nýsköpunarráðherra í vikunni.

Annars vegar er verkefnið „Aðkomusvæði við Skagagarðinn“, nýr ferðamannastaður í Garði. Verkefnið felur í sér hönnun og verklegar framkvæmdir. Skagagarðurinn er ævafornt mannvirki sem byggt var á 11. öld og með þessu verkefni er unnið að því að gera Skagagarðinn sýnilegan og vekja athygli á honum.

Áætlaður kostnaður við verkefnið er alls 14.600.000 og er styrkfjárhæð kr. 11.680.000.

Hitt verkefnið er göngustígur frá Útskálakirkju að höfn í Garði. Verkefnið felst í undirbúningi og hönnun á göngustíg með ströndinni frá Útskálakirkju að hafnarsvæði. Um er að ræða áframhald á göngustíg sem liggur meðfram ströndinni frá Garðskaga að Útskálakirkju. Í þessum áfanga er ekki gert ráð fyrir verklegum framkvæmdum.

Áætlaður kostnaður er kr. 3.800.000 og er samþykkt styrkfjárhæð kr. 3.040.000.

SJÁIÐ NÝJUSTU VÍKURFRÉTTIR 62 BLS. TROÐFULLAR AF FLOTTU EFNI!