Síldartorfa fyllir smábátahöfnina í Gróf

Risastór síldartorfa fyllir þessa stundina smábátahöfnina í Gróf. Hafði tíðindamaður Víkurfrétta á orði að hægt væri að ganga þurrum fótum yfir höfnina, svo mikil væri síldin.

Það var kannski ofsögum sagt að hægt væri að ganga þurrum fótum yfir höfnina, en hins vegar er sjórinn í smábátahöfninni eins og kraumandi suðupottur þar sem höfnin er full af síld sem syndir þar hring eftir hring. Gamlar aflaklær, skipstjórnarmenn með áralanga reynslu af síldveiðum, standa á bryggjukantinum með veiðistangir og húkka síld. Reynist síldin í lagi verður hún bæði steikt á pönnu og sett í marineringu, en síld sem veiddist í Faxaflóa fyrir fáeinum vikum reyndist sýkt.

Sæmundur Hinriksson hefur handleikið fisk í gegnum tíðina. Hann setti í þessa síld í Grófinni nú áðan.

Hún er falleg „Grófarsíldin“ sem veiðist nú á stöng í smábátahöfninni.

Gamlir sjóarar eru nú við veiðar í Grófinni. Höfnin er full af síld.



Víkurfréttamyndir: Hilmar Bragi Bárðarson