Séra Ólafur Oddur fékk Lundann

Séra Ólafi Oddi Jónssyni, sóknarpresti í Keflavík, var í kvöld veittur Lundinn 2003, sem er gripur sem Kiwanisklúbburinn Keilir í Keflavík veitir til einstaklings, sem af mati nefndar hefur látið gott af sér leiða og/eða unnið óeigingjarnt starf í þágu bæjarbúa eða bæjarfélagsins.
Verðlaunagripurinn er uppstoppaður lundi á stein ásamt verðlaunaplötu og skjali. Nefndina skipa þeir Ragnar Örn Pétursson, Halldór Guðmundsson og Ævar Guðmundsson. Fjölmargar ábendingar bárust nefndinni um einstaklinga sem allir voru vel að því komnir að fá þessi verðlaun. Það var hins vegar samdóma álit nefndarinnar að veita séra Ólafi Oddi verðlaunin.
Í rökstuðningi fyrir viðurkenningunni kom fram að Ólafi Oddi er veittur lundinn fyrir baráttu sína gegn sjálfsvígum. Það var fyrst á setningu umdæmisþings Kiwanis í Reykjanesbæ árið 2000 sem Ólafur gerði sjálfsvíg að umtalsefni á mjög eftirminnilegan hátt, en þá skömmu áður höfðu fjórir ungir menn á Suðurnesjum tekið líf sitt á sviplegan hátt. Í framhaldinu hefur verið unnið af verkefninu Lífs-vísi og kynningarefni dreift til ungmenna.
Nánar um þetta í Víkurfréttum í næstu viku.