Sendi út neyðarkall og óskaði lendingar

Viðbragðsaðilar voru settir á hæsta viðbúnað vegna lendingar Airbus A330 þotu frá Delta á Keflavíkurflugvelli á áttunda tímanum í kvöld. Rauður litakóði var virkjaður en hann segir m.a. til um fjölda farþega um borð í vélinni.

Áhöfn þotunnar sendi frá sér neyðarkallið „Mayday Mayday“ þegar vélin var stödd suður af landinu nú síðdegis. Áhöfnin hafði orðið vör við reyk í flugstjórnarklefa. Vélin var á leið frá London til Los Angeles.

Fjölmennt lögreglu- og sjúkralið var í viðbragðsstöðu við flugvöllinn og allir neyðarbílar flugvallarþjónustu Isavia voru virkjaðir.

Vélin lenti vandræðalaust og er nú á flugvélastæði við gamla stóra flugskýlið á Keflavíkurflugvelli.