Segja verulegar líkur á eldgosi

Land hefur risið í Svartsengi um 40 sentimetra síðan kvikugangurinn myndaðist í hamförum þann 10. nóvember sl. Hraði á landrisi Svartsengi hefur aukist á ný en í síðustu viku hægði á því. RÚV hefur eftir sérfræðingi á Veðurstofu Íslands að kvikusöfnunin sé orðin um þrír fjórðu af því sem leiddi til eldgoss 18. desember í fyrra.

Þrjár vikur eru í dag frá því eldgosið hófst. Það var kl. 22:17 mánudagskvöldið 18. desember. Gosið hófst með aðeins um 90 mínútna fyrirvara við Sundhnúkagígaröðina. Þegar mest var gaus á um 3.800 metra langri sprungu.

Benedikt Ófeigsson, fagstjóri hjá Veðurstofu Íslands, segir í samtali við RÚV í dag að hraðinn á landrisinu við Svartsengi sé svipaður og hann var fyrir gosið. Benedikt segir að allt bendi til þess að atburðarásin endi með gosi og það verði líklegast í Sundhnúkagígaröðinni, milli Hagafells og Stóra-Skógfells.

Magnús Tumi Guðmundsson, prófessor í jarðeðlisfræði við Háskóla Íslands, segir í samtali við mbl.is í dag að líkur á eldgosi við Sundhnúkagígaröðina séu verulegar.

„Landrisið held­ur áfram við Svartsengi og stöðin þar er kom­in í sömu hæð og áður, og er jafn­vel hærri. En aðrar stöðvar þarna í kring eins og Eld­vörp­in eru ekki kom­in í sömu stöðu og fyr­ir síðasta gos. Þró­un­in er sú sama og verið hef­ur,“ seg­ir Magnús Tumi við mbl.is.

Þá er haft eftir Þorvaldi Þórðarsyni, prófessor í eldfjallafræði við Háskóla Íslands, í Morgunblaðinu í dag að kviku­geymsl­an sé að fyll­ast og að hún sé kom­in að þol­mörk­um.

Þró­un­inni síðustu daga svipi til at­b­urðarás­ar­inn­ar fyr­ir eld­gosið 18. des­em­ber að mati Þor­vald­ar. Landrisið í Svartsengi sé orðið meira en þá og landrisið við Eld­vörp­in að nálg­ast sömu hæð og síðast.