Samþykkt að kaupa ryksuguna fyrir Reykjaneshöll

Bæjarráð Reykjanesbæjar samþykkti á fundi sínum í dag að kaupa hreinsivél að verðmæti kr. 4.751.822 til að bregðast við svifryksmengun í Reykjaneshöll. Þá var gengið að tilboði frá P.A. hreinsun um alþrif á Reykjaneshöll að upphæð kr. 1.842.600.
Þessar tillögur voru samþykktar samhljóða og var vísað til endurskoðunar fjárhagsáætlunar.

Þá samþykkti meirihluti Sjálfstæðisflokks að leggjast í eftirfarandi framkvæmdir við sundmiðstöð og knattspyrnuvöll Keflavíkur.

-Framkvæmdir við lóð Sundmiðstöðvar og Knattspyrnuvöll við Hringbraut kr. 14.200.000,-.
-Stækkun grasvallar (5 metrar á hverja hlið) kr. 3.900.000,-
-Girðingar meðfram Sunnubraut og niðurfyrir nýju bílastæðin kr. 8.600.000,-
-Stækkun á stúku kr. 9.814.828.

Hluti þessara framkvæmda eru til að mæta kröfum Knattspyrnusambnds Íslands. Minnihlutinn sat hjá við afgreiðslu málsins og lögðu fram eftirfarandi bókun:

Við teljum okkur ekki kleift að samþykkja hærri útgjöld en sem nemur þeim útgjöldum sem þarf að stofna til vegna skilyrða mannvirkjanefndar K.S.Í.

Guðbrandur Einarsson og Eysteinn Jónsson

Meirihlutinn svaraði því um hæl með annari bókun:
Sjálfstæðismenn leggja áherslu á að aðstaða knattspyrnu í efstu deild í sumar sé fullnægjandi og samþykkjum því framangreinda tillögu.

Böðvar Jónsson, Björk Guðjónsdóttir, Steinþór Jónsson.