Samstarf um uppbyggingu á frumkvöðlasvæði á Ásbrú

Þróunarfélag Keflavíkurflugvallar ehf (Kadeco) og Nýsköpunarmiðstöð Íslands (NMÍ) hafa undirritað samkomulag um samstarf um uppbyggingu á frumkvöðlasvæði á Ásbrú þar sem áhersla verður lögð á græna orku, heilbrigðisvísindi og samgöngur.

Samkvæmt samkomulagi þessu mun NMÍ þjálfa verkefnisstjóra frumkvöðlaseturs Eldeyjar og veita honum faglegan stuðning í þeim störfum er lúta að málefnum frumkvöðla, auk aðstoðar og umsagna við mat á umsóknum um rými á frumkvöðlasetrum á Ásbrú.

Frumkvöðlasetur á Ásbrú sem rekin eru af Kadeco munu falla undir fræðsluáætlun NMÍ og því verða haldnir fræðslufundir og fyrirlestrar á þeim frumkvöðlasetrum. Frumkvöðlar á Ásbrú munu jafnframt hafa aðgang að fræðsludagskrá sem fram fer á öðrum setrum NMÍ.

Víkurfréttamynd: Hilmar Bragi Bárðarson