Samstaða er góð

Það var stór stund í sögu Keflavíkur þegar Sjúkrahús Keflavíkurlæknishéraðs var tekið í notkun fyrir 48 árum og mikið gæfuspor sem þá var stigið. Það endurspeglast í því að allar götur síðan þá, hafa félagasamtök, einstaklingar og fyrirtæki á Suðurnesjum verið ötul við að safna fjármunum til tækjakaupa fyrir stofnunina.Slíkur velvilji og samhugur íbúa á þessu svæði gagnvart sjúkrahúsi sínu er stofnuninni ómetanlegur.
Það má með sanni segja að hafi þessi umhyggja íbúanna fyrir vel búinni Heilbrigðisstofnun hér, ekki verið svo ríkjandi værum við í annarri stöðu nú. Að fá byggða D-álmu við Heilbrigðisstofnunina hefur verið baráttumál fjölmargra íbúa á Suðurnesjum til fjölda ára. Nú hefur sú bygging risið og enn ríkir þessi umhyggja fyrir stofnuinni eins og árið 1954. Við vígslu D-álmunnar voru stofnuninni færðar margar góðar gjafir sem teljast að andvirði um 60 milljónir króna frá einstaklingum, félagasamtökum og fyrirtækjum. Allar þessar góðu gjafir skipta sköpum fyrir starfsemi D-álmu. Nú í vikunni var stofnuninni færð enn ein stórgjöfin. Sparisjóðurinn í Keflavík gaf fjarfundarbúnað af fullkomnustu gerð. Það gerir það að verkum að 9 hjúkrunarfræðinemar í fjarnámi við Háskólann á Akureyri eiga þess nú kost að stunda nám sitt í kennslustofu Heilbrigðisstofnunarinnar með aðstoð fjarfundarbúnaðarins, þar sem nemendurnir fá jafnframt sína verklegu kennslu. Auk þess sem búnaðurinn nýtist öllu starfsfólki stofnunarinnar sem telur um 240 stöðugildi. Búnaðurinn gerir m.a. fagfólkinu kleift að geta tekið þátt í ráðstefnum á mun auðveldari hátt en áður, hlustað á fyrirlestra hvaðan sem er, allt til að auka þekkingu sína og færni á sínu sviði. Það er í þágu okkar allra. Þessi stórhugur gefenda sýnir svo ekki verður um villst að hér er hægt að lyfta Grettistaki þegar Suðurnesjamenn sýna samstöðu í hagsmunamálum sínum. Höldum áfram á sömu braut.

Björk Guðjónsdóttir
bæjarfulltrúi í Reykjanesbæ
og varafulltrúi í stjórn HS.