Samkeppni um nafn á göngustíg

Undanfarin misseri hafa Grindavíkurbær, Bláa Lónið og HS Orka unnið í sameiningu að gerð göngu- og hjólreiðastígs á milli Grindavíkur og Bláa Lónsins. Stígurinn er um 5 km langur og er gerð hans langt komin. Hann verður vígður formlega í Jarðvangsviku þann 15. maí nk.
 
Ákveðið hefur verið að hafa samkeppni um nafn á stíginn. Glæsileg verðlaun eru í boði fyrir höfund nafnsins eða eins árs fjölskyldukort í Bláa Lónið og gjafabréf á Lava restaurant.
Vinsamlegast sendið tillögu að nafni á stíginn á netfangið [email protected] í síðasta lagi föstudaginn 3. maí n.k. kl. 12:00. Munið að senda með fullt nafn og símanúmer.
 
Miklar vonir eru bundnar við þennan nýja stíg hvað varðar ferðaþjónustu og útivist á svæðinu.  Göngu- og hjólreiðastígurinn var lagður í tvennu lagi, fyrst frá Grindavík og í Selskóg við Þorbjarnarfell síðasta sumar og er óhætt að segja að hann hafi slegið strax í gegn. Nú er seinni áfangi stígsins, frá Selskógi í Bláa Lónið, að verða tilbúinn en sá hluti liggur í gegnum úfið og ægifagurt hraunið og er vel þjappaður með fínu efni þannig að auðvelt er að hjóla hann fyrir þá sem vilja.