Sameining Samkaupa og Matbæjar frágengin

Sameining Samkaupa og Matbæjar er nú á lokastigi og hefur nýtt skipurit fyrir sameinað félag verið samþykkt. Guðjón Stefánsson verður framkvæmdastjóri nýja félagsins en starfsmenn verða um 500 talsins. Gert er ráð fyrir að heildarvelta fyrirtækisins á þessu ári verði rúmlega 8 milljarðar.
Eignarhald þessara félaga hefur verið sameiginlegt frá sl. áramótum, en reksturinn aðskilinn þar til nú. Eigendur að félaginu eru KEA og Kaupfélag Suðurnesja , auk um 300 einstaklinga. Félagið rekur alls 24 verslanir um land allt undir nöfnunum Nettó, Úrval, Samkaup, Sparkaup, Strax og Kasko. Að auki rekur félagið Valgarð, kostverslun á Akureyri og kjötvinnsluna Kjötsel í Reykjanesbæ. Að sögn Skúla Þ. Skúlasonar, starfsmannastjóra nýja félagsins er það þriðja stærsta matavörufyrirtækið á markaðnum, á eftir Baugi og Káupás. Á síðustu mánuðum hefur verið unnið í endurskoðun á helstu kostnaðarþáttum í félaginu og hagrætt á ýmsum sviðum. M.a. verður yfirstjórn félagsins einfaldari og mun ódýrari en áður.
Í stjórn Samkaupa hf. eru Jón Sigurðsson formaður, Halldór Jóhannsson, Magnús Haraldsson, Rögnvaldur Skíði Friðbjörnsson og Ólafur Gunnlaugsson. Auk Guðjóns og Skúla koma fleiri Suðurnesjamenn að daglegum rekstri fyrirtækisins, Ómar Valdimarsson verður fjármálastjóri en hann hefur starfað hjá Samkaupum frá 1996 og Sturla Eðvarðsson sem hóf störf sín hjá Samkaupum í Njarðvík árið 1994. Norðanmenn í lykilstöðum eru Hannes Karlsson og Gísli Gíslason rekstrarstjórar og Axel Aðalgeirsson, forstöðumaður upplýsingamála. Nýtt skipurit félagsins tekur gildi 15. þessa mánaðar.