Sædís Bára sjósett í Njarðvík

Báturinn Sædís Bára var sjósettur í Njarðvíkurhöfn í dag en báturinn er smíðaður frá a til ö af Suðurnesjamönnum og hér á svæðinu. Nánar til tekið í fyrrum húsi Eldafls í Njarðvík. Báturinn er 15 tonn að þyngd og gerður úr trefjaplasti. Báturinn hefur verið í smíði síðan í desember árið 2010 en upphaflega stóð til að smíða lítinn sex metra langan bát. Eitthvað varð verkið stærra í smíðum og á endanum varð til þessi glæsilegi 13 metra langi bátur sem gerður verður út frá Garðinum. Menn sem þekkja vel til segja að það sé orðið ansi langt síðan svo stór bátur hafi verið smíðaður hér á Suðurnesjum.

Ragnar Þór Georgsson er einn eigenda bátsins en hann sagði í samtali við Víkurfréttir að farið yrði að róa strax í næstu viku. Þá er förinni heitið á Skagaströnd þar sem rennt verður fyrir ufsa á handfæri. Þrír aðrir eiga bátinn ásamt Ragnari en það eru þeir Viktor, Róbert Georgsson og Halldór Pétursson fiskverkandi í Garði. Blaðamaður Víkurfrétta fylgdist með för Sædísar þegar báturinn fór á flot í við Skipasmíðastöðina í Njarðvík í dag. Hér að neðan má sjá ljósmyndir frá ferðalaginu.