Ruslahaugur í Rockville

Umgengnin á Rockville-svæðinu á Miðnesheiði er fyrir neðan allar hellur. Eftir að fasteignir á svæðinu voru rifnar varð svæðið að vinsælu útivistarsvæði. Þarna hefur fólk vanið komur sínar með hunda og leyft þeim að hlaupa frjálsum um svæðið.

Á Rockville-svæðið virðast umhverfissóðar einnig venja komur sínar. Þarna hefur heimilissorpi verið hent, múrbroti og ýmsu öðru. Víkurfréttir fengu ábendingu í gærkvöldi um að algjörlega hafi keyrt um þverbak í sóðaskapnum.

Húddloki, skottloki og tveimur hliðarhurðum af BMW hefur verið hent við eitt helsta skógarrjóðrið í Rockville. Þar eru einnig hrúgur af sorpi ýmiskonar, fatnaður og bílavarahlutir.

Þeir sem vita upp á sig skömmina með ruslið í Rockville eru hvattir til að fara á svæðið og hreinsa það eftir sig. Sorpeyðingarstöð Suðurnesja tekur við öllu þessu rusli frá einstaklingum án endurgjalds alla daga vikunnar.

Mynd: Ruslið í Rockville í gærkvöldi.