Rollur við Reykjanesbraut

Sex kindur sáust á beit í mosavöxnu hrauninu við Reykjanesbrautina á dögunum. Þetta er í þriðja skiptið í sumar sem lögreglunni í Keflavík berast kvartanir vegna þessa. Kindurnar virtust ekkert kippa sér upp við umferðina. Greint var frá þessu á Stöð 2.

Aðstæður á brautinni hafa verið tiltölulega góðar í sumar en að sögn lögreglunnar í Keflavík hefur eftirlit með hraða þar verið stóraukið að undanförnu. Aðeins nokkrum metrum frá brautinni má finna nokkrar rollur sem hafa sloppið úr girtu svæði innar úr hrauninu.

Jón Þór Karlsson, varðstjóri hjá Lögreglunni í Keflavík segir það koma upp með reglulegu millibili að kindur nálgist veginn en þó sé ekki hægt að segja það gerist oft. Vanalega eru þær nokkur hundruð metra frá brautinni þegar lögreglan er kölluð til en í þetta skiptið voru þær komnar nánast alveg að veginum. Jón Þór segir mjög lítið vera af sauðfjárrækt á þessu svæði en þó eitthvað. Því komi þetta upp öðru hvoru en fólki er bent á að hafa samband við Lögregluna í Keflavík, sjái það rollur á þessum slóðum.