Rólegir páskar hjá Keflavíkurlögreglunni

Ekki gerðist margt fréttnæmt hjá lögreglunni um þessa löngu helgi. Vinnuslys varð þó á skírdag, þegar maður í byggingarvinnu féll úr álstiga tæpa tvo metra og lenti á bakinu. Hann var fluttur á slysadeild og voru meiðsli hans ekki alvarleg. Brotist var inn í bát í Grindavík um helgina. Engu var stolið, en gramsað hafði verið í lyfjaskáp og telur lögreglan að leitað hafi verið að fíkniefnum. Sinubruni var í kirkjugarðinum í Staðarhverfi við Grindavík og er talið líklegt að þar hafi verið að verki lögbýliseigendur staðarins. Slökkviliðið var kallað út og slökkti eldinn, en leyfi sýslumanns þarf fyrir öllum sinubruna.