Risaflugvél í hjartastoppi í Keflavík

Airbus A380 frá Lufthansa er nú á Keflavíkurflugvelli eftir að farþegi um borð veiktist. Tilkynnt var um hjartastopp en svo reyndist ekki vera þegar sjúkraflutningamenn frá Brunavörnum Suðurnesja komu um borð í vélina á austursvæði Keflavíkurflugvallar.

Vélin, sem er stærsta farþegaþota heims, lenti á Keflavíkurflugvelli kl. 12:48. Þotan var á leið frá Frankfurt í Þýskalandi til San Francisco í Bandaríkjunum.

Tilkynnt var um veikindin þegar vélin var stödd suður af landinu og þotunni þegar snúið til Keflavíkurflugvallar.

Tveir sjúkrabílar voru sendir á vettvang en það er ávallt gert þegar tekist er á við hjartasjúkdóma og mikið liggur við.

Meðfylgjandi myndir tók Hilmar Bragi nú áðan af vélinni á Keflavíkurflugvelli.



Sjúkrabílar og slökkvibíll við A380 þotuna á Keflavíkurflugvelli nú áðan.



A380 er engin smásmíði. Farþegarými á tveimur hæðum og geta flutt allt að 800 farþega.



Sjúkrabílarnir tveir fara af vettvangi á Keflavíkurflugvelli.





Airbus A380 frá Lufthansa og Airbus A321 frá Wowair á Keflavíkurflugvelli nú áðan.