Reynir Valbergsson bæjarstjóraefni A-listans í Reykjanesbæ

Reynir Valbergsson, fyrrverandi fjármálastjóri Reykjanesbæjar og skipar sjötta sæti hjá A-listanum fyrir komandi sveitarstjórnarkosningar er bæjarstjóraefni framboðsins.

Sjötta sætið er baráttusætið í komandi kosningum og var Reyni vísvitandi stillt upp í oddasætið sem ræður úrslitum í kosningunum 27. maí.

A-LISTINN leggur áherslu á að í komandi kosningum sé verið að kjósa bæjarstjórn en ekki bæjarstjóra og er Reynir hinn faglegi framkvæmdastjóri sem A-LISTINN hefur valið sem sitt bæjarstjóraefni. Rekstrarþekking Reynis er óyggjandi og afar mikilvæg fyrir bæjarfélagið til að bregðast hratt og örugglega við mikilli skuldasöfnun síðustu fjögurra ára”, segir í frétt frá A-listanum.

Reynir er með meistaragráðu í viðskiptafræði (MBA) frá Edinborgarháskóla og véltæknifræðingur frá Tækniháskólanum í Árósum. Reynir starfar nú sem fjármálastjóri hjá ITS sem er eitt af dótturfélögum Icelandair-Group.

Áður starfaði hann sem fjármálastjóri Reykjanesbæjar til níu ára og sjö ár sem ráðgjafi hjá Verkfræðistofu Guðmundar og Kristjáns.

Reynir er Suðurnesjamaður í húð og hár og er hann kvæntur Unu Steinsdóttur, útibúastjóra Glitnis í Reykjanesbæ.