Reykur í fámennu flugi

Tilkynnt var um reyk um borð í Boeing 777-200 þotu British Airways suður af landinu í dag. Vélinni, sem var á leið frá London til New York, var snúið til Keflavíkurflugvallar þar sem hún lenti um kl. 15 í dag.

 

Lendingin tókst vel en fjölmennt lið viðbraðgsaðila tók á móti vélinni sem beint var á flugvélastæði við flugskýli 885 á Keflavíkurflugvelli.

 

Ekki hafa fengist upplýsingar hvað olli reyk í vélinni en farþegarnir, liðlega 130 talsins, voru enn um borð í vélinni nú áðan. Þess má geta að þota af þessar stærð tekur um 400 farþega.

 

Hótel hefur verið sett í viðbragðsstöðu og gert tilbúið til að taka á móti farþegunum ef ekki verður haldið áfram yfir hafið.