Reykjanesbraut: Tilboð opnuð í dag

Tilboð í útboð Vegagerðarinnar vegna verkloka við tvöföldun Reykjanesbrautar verða opnuð eftir hádegi í dag. Skilafrestur á tilboðum er til kl. 14 og verða tilboð opnuð 15 mínútum síðar.

Þegar hefur verið samið við verktakafyrirtækið Eykt að ljúka smíði tveggja brúa, en afgang verksins þurfti að bjóða út eftir gjaldþrot Jarðvéla.

Kristján L. Möller, samgönguráðherra, sagði á þingi í gær að stefnt væri að því að Reykjanesbrautin yrði umferðarhæf  fyrir 15. október nk.

Það kom fram í svari hans við fyrirspurn Steinunnar Valdísar Óskarsdóttur, en á vísi.is er haft eftir henni að hún hafi sagt ástand umferðaröryggismála á Brautinni óásættanlegt. Þar hafi orðið 23 slys á kaflanum frá Vogaafleggjara að Keflavík, og þar af þrjú alvarleg.

Í svari sínu benti ráðherrann á að vegmerkingar hefðu verið settar upp á umræddum spotta. Þar væru vegmerkingar með 50 kílómetra hámarkshraða en þegar hann hefði ekið þar um hefðu margir ekið hraðar en það. Aðalatriðið væri að vegfarendur sýndu varkárni í akstri.

H: www.visir.is

 

Loftmynd/Oddgeir