Reykjanesbær: Unnið að endurskoðun deiliskipulags

Reykjanesbær hefur hafið vinnu við endurskoðun Aðalskipulags Reykjanesbæjar 2006-2021.  Leitað var til Kanon arkitekta og VSÓ Ráðgjafar til að vinna að endurskoðun aðalskipulagsins. Í frétt á heimasíðu Reykjanesbæjar segir að miklar breytingar séu fyrirhugaðar á landnotkun innan sveitarfélagsins og er lögð áhersla á að vinna að heildarstefnu sveitarfélagsins í þeim efnum.  Endurskoðun aðalskipulags verður stefnumarkandi heildarsýn varðandi þróun sveitarfélagsins til næstu 15 ára.  Skipulaginu er ætlað að stuðla að hagkvæmri og skynsamlegri nýtingu lands, móta stefnu um þróun byggðar, samgöngu- og þjónustukerfa og landnotkunar ásamt því að leggja mat á helstu áhrif skipulags á umhverfi og samfélag.

Bæjarstjórn Reykjanesbæjar stofnaði stýrihóp um aðalskipulagsvinnuna sem starfar með ráðgjöfunum.  Stýrihópinn skipa: Árni Sigfússon, bæjarstjóri, formaður, Steinþór Jónsson, formaður umhverfis– og skipulagsráðs og Eysteinn Jónsson, fulltrúi í bæjarráði.  Með hópnum starfa Sigríður Jóna Jóhannesdóttir, tæknifulltrúi, Umhverfis-og skipulagssviði og Sveinn Númi Vilhjálmsson, bæjarverkfræðingur.

Nú er unnið að Áfangaskýrslu 1: Leiðarljós, forsendur og skipulagsáherslur, þar sem fjallað er um helstu forsendur og skipulagsmarkmið fyrir endurskoðun Aðalskipulags Reykjanesbæjar 2006 – 2021.

Stefnt er að opnum íbúafundi um forsendur og markmið aðalskipulagsendurskoðunarinnar í september n.k., til að fá fram hugmyndir, sjónarmið og ábendingar frá íbúum bæjarfélagsins á fyrstu stigum vinnunnar.

Af vefsíðu Reykjanesbæjar